PHOTO
Sardigna ischida oh Terra mia.
Sardigna ischidad'oh Patria Mia!
Fizos tuos de nou a rallegrare,
Arribada est s'ora de cambiare
Sa nostra culla de rara zenia!
Terra d'invidiabile bellesa
Cale durche sirena ammajadora,
T'han dipintu che perfida colora
Disonorende sa tua puresa,
De Platone sos versos raccontaos
Ant connottu su zustu valore,
E preda istada ses de s'invasore
Dae sos tempos antigos passaos,
E su granitu nos cantat s'istoria
Che una cara e soave illusione,
De misteriu iscritta est sa cantone
E in s'aera pintada est sa gloria.
E i sa forza de mama natura
Ti hat mudadu in ogni mamentu,
Ses creta tra sor bratzos de su ventu
Chi at iscolpindu sa tua bellura.
De sa bellesa tua su valore
Incadenadu est in sa gostera,
E non at vidu mai primavera
Pro curpa de s'istranzu usurpadore,
Ti han sangradu chin viles abusos
E t'han derisu in oras de affannos
Ponimos fronte a custos tirannos
Cambiende sos nostros malos usos,
Issos fattos si sun grassos e mannos,
Cun su sudore de sos jajos nostros,
E nois mai nos semos oppostos
Restende Isciaos pro mizas de annos,
Ma como boi caros frades mios
Che shardanos mirende s'orizonte,
Pesadebos che gigantescu monte
Pro dare a s'invasore sos adios,
Artzamos sa pandela cun onore
Pro lu suprimer s'ingiustu tirannu,
Chi dae sempere noa atit solu dannu.
E a custa terra torramos su lugore!
Ridonamos a su sardu pastore
Sa dignidade sua e su rispettu,
E a feminas e betzos s'affettu
Semenande s'issoro raru amore,
E sa sementza de s'agricoltore
Lassadela in paghe gelmojare,
Sos fruttos de sa terra demos dare
Pro chi sa perla riprendat valore.
Su politicu est bonu a preigare
Ma ratziat sa cassa cun ingannu,
Che Cainu a sos frades faghet dannu
Profitend'e s'anzenu suorare.
Tropu tempus a luttu t'han bestida
E versadu as lacrìmas de dolore,
Bidende nascher solu malumore
E pro s'eternu s'anima intristida.
Frades torrade a Mama su sorrisu
Dipinghende s'avaru cun fiores,
Preighende sa paghe a sos minores
E ricamade custu paradisu..
Giuseppe Rendini