Guasi 92.000 euros sunt istados donados finas a como a sos fizos de Michela Fiori, sa femina bocchida in S’Alighera dae su maridu duas dies prima de Nadale.

L’at annuntziadu in su profilu Facebook sou su sindigu de sa tzittade Mario Bruno, chi at ringratziadu  de coro “totta sa comunidade e totta s’Isula e sos chi ant cherfidu dare unu signale finas dae Continente”.

Su dinari "at a servire pro sustennere sas ispesas issoro: dae cussas de s’iscola a cussas de sa sanidade, dae sas sotziales a sas isportivas e de inue ant a istare – at nadu Bruno – Maicantos tzittadinos e familias ant contribuidu chin donatzionas dende sa possibilidade de raggiunghere unu numeru importante”.

"Tiamus cherrere ajuare sos piseddos finas a sos 20 annos e a sos 26 annos si ant a detzidere de andare a s’universidade”.

Su Comitadu chi at istituidu su fundu (Comune, Diocesi, Nettuno Calcio, Bancu de Sardigna) s’est riunidu chin su tutore, sa nonna Giuseppina, pro detzidere comente impittare su dinari già dae subitu.