Sa suttasegretaria a sa Cultura de su Guvernu Renzi, Francesca Barracciu, est istada cundennada a 4 annos pro s'aer remonidu inari anzenu a sa fine de s'indagada appropositu de s'iscandalu de s'inari chi tocaiat a sos gruppos de su Cossizu regionale de sa Sardigna et est istadu impitadu pro acchistos chi no fint de interessu istitutzionale.

Sa sententzia est arrivida a sas undighi e mesa de custu manzanu dae su Tribunale de Casteddu poi de una mes'ora de camera de cossizu.
Su pubblicu ministeriu Marco Cocco aiat pedidu pro s'imputada 5 annos de galera pro s'aer remonidu 81 miza euros.
Francesca Barracciu at nadu: "Apo a recurrere a sa Colte de appellu. So istronada, ma a su mantessi tempus tranchiglia ca custu est solu su primu tempus de una partida chi nd'at a durare tres. Amus a leggere sas motivasciones de sa cundenna mia".
"Sunt istados battor annos difitziles meda. So istada s'unica in Sardigna a rinuntziare a sas garrigas chi mi tocaiant, e pro custu mi so agatada a sa sola. Ma su chi est sutzessu mi at dadu fortza meda. Ispero de balanzare dae su chi mi est capitadu, e de essere diventada una pessone menzus de su chi fia. Chin custa forza apo a andare a dainanti finas a su segundu gradu".
Francesca Barracciu at contadu de aer ispesu una parte de su inari de su gruppu sou pro pagare sa nafta impitada pro sos viaggios politicos ma no est resessida a ispiegare pro ite tzeltos contos no torraiant.

S'indagada tocheit 85 politicos de dresta e de manca, de custos una vintina sunt a giudisciu, sos ateros sunt aisetende.

Barracciu, chi in s'atunzu de su 2013 bincheit sas primarias politicas de manca pro ischirriare su candidadu presidente a sa Regione, si remonzeit poi de s'iscandalu. A su postu sou, su Partidu Democraticu, fateit intrare Francesco Pigliaru chi bincheit sas eletziones.