Non t’apo mai vidu e nen connottu,
Non t’apo mai intesu e ne faeddadu,
Ma oe cali-cunu at destinadu,
De nos toviare a pare in cussu impostu!

Sa die de sos cuntentos mannos,
Sa die de sa naskida’e su Messia,
Sa die de sa gioia e s’allegria,
Aìo e ti ‘ider in funestos pannos?

Non podiamus connoskes su dispostu,
Unu sicundu prima, joviale,
Ridende a sa vida, in Nadale,
E a pustis de gai male cumpostu!

No acudo a narres ite (tottu) apo pensadu,
A cando ruttu male ti apo vistu!
S’animu meu si est de luttu tristu..
..bestìdu! E su coro istraziadu!

Prima’e tando connottu mai t’aìa,
E in cussu istante fritta una lama..
..mi at trapassadu, e ke ardente frama,
..parìa dae sempes ki ti connoskìa!

Penso a mama e a babbu tuo,
A s’istraziu, a su dolu e sa piedade,
A pustis isco vinas de unu frade…
..kin tegus mortu…e tando rùo!

Bos apada in sa Gloria su Segnore,
Kin Gesusu oe naskìdu e kin Maria,
Coraggiu a babbu’e a mamma lis dìa,
In custa die de istraziu e de dolore!

Dae parte mea ite ad abarrare? 
Su dolu de cussu tristu mamentu,
Da oe cada Nadale tristu amentu,
E una lagrìma de bos dedicare!

In custa die pintà dae sa morte,
Sa falke nd’at messadu duos veranos!
A sa familia astringo sas manos,

Sas condoglianzas meas, custrintas e fortes!