Pietro Sanna, su nuoresu de 24 annos mortu in Londra su 23 de su mese de Lampadas passadu, est istadu bocchidu dae sa pisedda betza sua Hasna Begum, 25 annos, chi est  istada cundennada a s'ergastolu.

Segundu su c'ant nadu sos zuighes de Londra, sa bengalesa tiat aer bocchidu a Pietro Sanna ca fit belosa poi chi si fint lassados

Issos duos isteint impare pro un annu, cando sos rapportos fineint sa pisedda incomintzeit a pessighire su 24enne nuoresu chi trabagliaiat in una sala de Londra comente sonadore.

 

Hasna Begum, segundu sos zuighes, sighiat su piseddu in tottue e istaiat cumpudendeli sas paginas de internet tantu chi si che fit posta in conca chi isse aiat agattadu femina.

Est propriu tando chi sa bengalesa tiat aer detzisu de si vindicare. Poi de s'essere trusada, est andada a domo de Pietro Sanna e l'at bocchidu chin 36 istoccadas. Pietro Sanna est mortu poi de paritzas oras, sos bighinos de domo l'ant intesu a lamentas pro meda.

Dae sas immagines de sas telecameras de sa zona inue istaiat Pietro Sanna, s'idet sa giovana andendesiche dae domo sua.