Pro sa Zona Franca

O rima sarda azzudami e ispira
Daemi versos ch’ischiden sos coros
Trunca sas funes , cadenas e loros
Torra a sa zente Sarda odiu e ira

Torrali a custu populu iscuntentu
Sa orza e su rebelle Ampsicora
No ti trattenzat arribada est s’ora
de allughere su focu ch’it ispentu

che semus dae tottus istrajados
garrigados de rughes e affannos
a nois nos ingarrigan sos dannos
issos mantenes sos benes prejados

troppu s’ischina amus piegadu
troppu semus istados in anneu
mai semus istados in recreu
donzi cosa a nois an negadu

troppu as prantu tue isola mia
como cussu piantu assutta e cessa
ca non ti cherjo ne vinta ne arressa
de libertade imbucca sa via

Non cherjo ves a s’arranca arranca
Meritas tue prus valore certu
T’ana negadu su dirittu e fertu
Vortula tottu, diventa Zona Franca

Peppe Montesu